Opens in a new tab
Til bakaHátíðarmatur

Hamborgarhryggur með léttara meðlæti

Ali hamborgarhryggur er ómissandi á hátíðarborðið. Hér er hann gljáður með púðursykri, rauðvínsediki og appelsínu og borinn fram með léttara meðlæti en þessu klassíska – smjörsteiktum kartöflum með hvítlauk og timían og frískandi salati með eplum, mangó, möndlum og dökku súkkulaði.

Fullkomin útfærsla fyrir páskana eða hvaða hátíðarstund sem er. Uppskriftin dugar fyrir 5–7 manns.

Uppskrift: Berglind Hreiðarsdóttir.

Gljáður Ali hamborgarhryggur með appelsínusneiðum, smjörsteiktum kartöflum og páskasalati

Innihaldsefni

Hamborgarhryggur og gljái

  • Ali hamborgarhryggur, um 2,5 kg
  • 1 l vatn
  • 160 g púðursykur
  • 50 ml rauðvínsedik
  • 50 ml rjómi
  • 3 msk. appelsínusafi (úr appelsínu)
  • 3 sneiðar af appelsínu

Sósa

  • ½ laukur
  • 50 g smjör
  • 50 ml rauðvínsedik
  • 500 ml kjötsoð (eða vatn + kraftur)
  • 500 ml rjómi
  • 100 ml af gljáa
  • Sósulitur
  • Salt og pipar
  • Maizena sósujafnari

Smjörsteiktar kartöflur

  • 1 kg forsoðnar kartöflur (litlar)
  • 70 g smjör
  • 3 hvítlauksrif
  • 1 msk. saxað timían
  • Salt og pipar

Páskasalat

  • 2 Pink Lady epli (3 ef lítil)
  • 1 mangó
  • 50 g möndlur með hýði
  • 30 g dökkt súkkulaði
  • 100 g sýrður rjómi
  • 150 ml þeyttur rjómi
  • 1 msk. sykur
  • 1 tsk. salt

Aðferð

Hamborgarhryggur og gljái

  1. Búið til gljáa með því að sjóða saman púðursykur og edik. Leyfið að sjóða aðeins og bætið rjóma og appelsínusafa við. Hitið að suðu og lækkið hitann, leyfið að malla við lágan hita þar til sykurinn er uppleystur.
  2. Hellið 1 l af vatni í ofnskúffu neðst í ofninum og stillið hitann á 150°C.
  3. Setjið hamborgarhrygginn á ofngrind og penslið einu sinni með gljáanum. Stingið kjöthitamæli inn og komið grindinni fyrir í ofninum fyrir ofan skúffuna. Penslið 1–2 sinnum á meðan eldun stendur yfir. Án mælis: 45 mínútur til klukkustund á hvert kíló.
  4. Eldið þar til kjarnhiti sýnir 55°C, hækkið þá hitann í 210°C, setjið appelsínusneiðarnar ofan á og penslið aftur. Eldið þar til kjarnhiti sýnir 67°C og leyfið hryggnum að standa í að minnsta kosti 15 mínútur áður en hann er skorinn. Setjið lokaumferð af gljáa yfir appelsínurnar.
  5. Geymið soðið og gljáann til sósugerðar.

Sósa

  1. Saxið laukinn smátt og steikið upp úr smjöri, kryddið með salti og pipar.
  2. Hellið edikinu yfir laukinn og leyfið því að sjóða niður.
  3. Bætið sigtuðu soði (eða vatni + krafti) ásamt rjóma og gljáa saman við.
  4. Smakkið til með salti, pipar og krafti og leyfið að malla.
  5. Þykkið með Maizena sósujafnara og litið með sósulit ef óskað er.

Smjörsteiktar kartöflur

  1. Bræðið smjörið á pönnu og setjið kartöflurnar út á ásamt rifnum hvítlauk og timían.
  2. Veltið um á meðalháum hita þar til kartöflurnar eru heitar og kryddið eftir smekk.

Páskasalat

  1. Flysjið eplin, skerið smátt og setjið í skál.
  2. Skerið mangó smátt og bætið saman við eplin.
  3. Skerið möndlurnar gróft og saxið súkkulaðið, bætið út í ávextina.
  4. Hrærið sýrða rjómanum ásamt sykri og salti saman við.
  5. Vefjið þeytta rjómanum varlega saman við með sleikju.
  6. Geymið í kæli fram að notkun.

Fæst í verslunum